फालेलुङ महोत्सवमा आयोजित महिला मिनि म्याराथनको उपाधि मिक्लाजुङकी पुस्पा शेर्माले जितिन्

फालेलुङ, पाँचथर ।

फालेलुङ गाउँपालिका – ३ र ४ वडाको संगम स्थल सिर्लिङ्गी टारमा आयोजित दोस्रो फालेलुङ महोत्सवमा महिला मिनि म्याराथन प्रतियोगिता सम्पन्न भएको छ। सो प्रतियोगितामा मिक्लाजुङ गाउँपालिका-२ की पुस्पा शेर्माले १० किलोमिटरको दुरी १ घन्टा ९ मिनेटमा पार गर्दै उपाधी जितेकी छन्।

महोत्ससव चैत १८ गतेदेखि शुरु भएको हो। प्रतियोगिताको रूट थाप्लिको सिर्लिङ्गी टारदेखि शुरु भएर तीनसिमाना पुगेर पुनः सोही स्थानमा फर्किनुपर्ने थियो।

शेर्माले प्रतियोगितामा १ घन्टा ९ मिनेटमा दूरी पार गरेर पहिलो स्थान प्राप्त गरिन्। दोस्रो स्थानमा फालेलुङ-६ की सरला राई रही १ घन्टा १७ मिनेटमा र तेस्रो स्थानमा फालेलुङ-४ की रेनुका राई रहेकी छन्, जसले १ घन्टा १८ मिनेटमा प्रतियोगिता पूरा गरिन्।

अन्य पुरस्कार विजेताहरूमा चौथो स्थानमा फालेलुङ-४ की सपनी राई (१ घन्टा २२ मिनेट), पाँचौं स्थानमा फालेलुङ-४ की आशिका राई (१ घन्टा २३ मिनेट), छौंठौं स्थानमा फालेलुङ-४ की बसन्ती राई (१ घन्टा २४ मिनेट), सातौं स्थानमा फालेलुङ-४ का बिबि राई (१ घन्टा ३१ मिनेट), आठौं स्थानमा फालेलुङ-३ की अस्मिता मैनाली (१ घन्टा ३२ मिनेट), नौौं स्थानमा फालेलुङ-४ की टीका राई (१ घन्टा ३६ मिनेट) र दशौं स्थानमा फालेलुङ-३ की पूजा राई (१ घन्टा ५४ मिनेट) रहेका छन्।

विजेताहरूलाई नगद पुरस्कार र प्रमाणपत्र प्रदान गरिने जानकारी महोत्सव आयोजक तीन सिमाना जनसेवा समाज नेपालका अध्यक्ष लेन्जो सावदेनले दिएका छन्। प्रथम विजेता पुस्पा शेर्माले नगद २० हजार, मेडल र प्रमाणपत्र प्राप्त गर्ने छन्। दोस्रो विजेता सरला राईले नगद १०हजार, मेडल र प्रमाणपत्र प्राप्त गर्ने छन्। तेस्रो विजेता रेनुका राईले नगद ५ हजार, मेडल र प्रमाणपत्र प्राप्त गर्ने छन्। साथै, सबै सहभागी धावकहरूलाई प्रमाणपत्र प्रदान गरिने छ।

महामहोत्सवको समापन २३ गते हुने छ, जसमा मैत्रीपूर्ण खेल र फुटबल प्रतियोगिताको विजेतालाई पुरस्कार वितरण गरिने कार्यक्रम रहेको छ। समापन समारोहमा भौतिक पूर्वाधार मन्त्री भुपेन्द्र राई प्रमुख अतिथिका रूपमा उपस्थित हुनेछन् भने माओवादी केन्द्रका १ नम्बर प्रदेश कमिटी अध्यक्ष हर्कबहादुर नेम्वाङ (मिक्सो) विशेष अतिथिका रूपमा उपस्थित हुनेछन्।

समारोहमा एक सांगीतिक प्रस्तुति पनि हुने छ, जसमा चर्चित गायिका बबिना किराँती राई, मिङ्सो केरुङ, दिपेश मगर, सुनिल केरुङ, बिज्ञान जबेगू र मौसम थाम्सुहाङको आकर्षक प्रस्तुतिहरू रहने छन्।